ပြည်ထဲရေးဝန်ကြီးဌာနနှင့် မြန်မာနိုင်ငံရဲချုပ်ကြီးတို့သိရှိရန်

ပြည်ထဲရေးဝန်ကြီးဌာနနှင့် ရဲချုပ်ကြီးသိရှိနိုင်စေရန် အကြံပြုတင်ပြအပ်ပါတယ်။ မြန်မာနိုင်ငံရဲတပ်ဖွဲ့တွင် ဖြစ်ပျက်နေသည့်အကြောင်းအရင်းများအား တစိတ်တပိုင်းသိရှိနိုင်ရန် ပြည်သူတစ်ဦးနေဖြင့် အကြံပြုတင်ပြအပ်ပါတယ်။

မြန်မာနိုင်ငံရဲတပ်ဖွဲ့ရှိ ရဲစခန်းတွင် တာဝန်ထမ်းဆောင်နေရသည့် တပ်ဖွဲ့ဝင်များသည် အထက်ဌာနမှ ချပြသည့် ညွှန်ကြားချက်များအားသိရှိကြောင်း၊ လိုက်နာဆောင်ရွက်ရမည်ဖြစ်ကြောင်း စသည်ဖြင့် ၀န်ခံကတိပြုလက်မှတ်များ ရေးထိုးပြီး အထက်ဌာနစိတ်များသို့ ပြန်လည်တင်ပြရကြောင်း၊ သို့သော် ရဲစခန်းရှိ တပ်ဖွဲ့ဝင်များမှ ၄င်းဆန္ဒများအား အထက်ဌာနများသို့ တင်ပြရာတွင် အဆင့်ဆင့်ကြာမြင့်လျှက်ရှိကြောင်း၊ မိမိတင်ပြလိုက်လျှင် အထက်အကြီးအကဲများ၏ ငြိုငြင်မှုများ၊ အဖုအထစ်အကြိတ်အခဲများ ဖြစ်လေမလား ဆိုသည့်စိုရိမ်မှုများကြောင့် နှောင့်နှေးကြန့်ကြာမှုများ ဖြစ်ပေါ်လျှက်ရှိနေပါတယ်။

ဥပမာ - ရဲတပ်ဖွဲ့တွင် စိတ်ပါဝင်စားမှုမရှိ၊ ရဲတပ်ဖွဲ့တွင် ဆက်လက်တာဝန်မထမ်းဆောင်နိုင်ကြောင်း နှုတ်ထွက်ခွင့် တင်ပြစာများသည် ရဲစခန်းတွင်လည်းကောင်း၊ မြို့နယ်ရဲတပ်ဖွဲ့မှူးရုံးများတွင် လည်းကောင်း၊ ဆင့်ကဲဆင့်ကဲ ကြန့်ကြာလျှက်ရှိနေကြောင်း နှင့် ရဲတပ်ဖွဲ့ဝင် ပြုန်းတီးမှုအင်အား များပြားသည်ဟု အကြောင်းပြလျက် အထက်ဌာနများသို့ ဆက်လက်တင်ပြခြင်းမရှိ ဆိုင်းငံ့ထားသည်ကိုလည်း သိရှိရပါတယ်။

ရဲချုပ်ကြီးခင်ဗျာ `မြန်မာနိုင်ငံရဲတပ်ဖွဲ့´ တွင် ရဲတပ်ဖွဲ့အင်အား နည်းရသည့် အကြောင်းအရင်းများအား အသေးစိတ်လေ့လာပြီး ပြန်လည်စီစစ်ပြီး တပ်ဖွဲ့အင်းအားတိုးပွားလာအောင် ဆောင်ရွက်သင့်ပါကြောင်း အကြံပြုချင်ပါတယ်။

အထက်ဌာနများမှ ရဲစခန်းများတွင် တာဝန်ထမ်းဆောင်လျှက်ရှိသည့် စခန်းမှူနှင့် နယ်ထိန်းတပ်ဖွဲ့ဝင်းများအား ရဲတပ်သားသစ် တစ်လလျှင် (၁) ဦးကျစုဆောင်းရန် မရရှိပါက လက်ရှိနေရာအား ပြောင်လဲပစ်မည်၊ နယ်ပြောင်းပစ်မည်ဟု ခြိမ်းခြောက်ကာ နည်းအမျိုးမျိုးအကြပ်ကိုင်ပြီး စုဆောင်းခိုင်းသဖြင့် အဆိုပါတပ်ဖွဲ့ဝင်းများမှ မိမိတို့၏ မိသားစု နေရေး ထိုင်ရေး၊ ပညာရေးကဏ္ဍများအား ငဲ့ညာရကာ ရပ်ကွက်အတွင်းရှိ လူငယ်များအား အမျိုးမျိုးမက်လုံးပေးကာ စုဆောင်းနေရကြောင်း သိရှိရပါတယ်။

မြန်မာနိုင်ငံရဲတပ်ဖွဲ့တွင် အဓိကအားနည်းချက်မှာ လုပ်သက် (၃၀) ပြည့်ပြီး ပင်စင်ခံစားချိန်တွင် အိုးပိုင်၊ အိမ်ပိုင်မရှိခြင်း အသက်မွေးဝမ်းကျောင်း စီးပွားရေးလုပ်ငန်းများတွင် နှောင့်နှေးမှုများ ဖြစ်ပွားလေ့ရှိပြီး အချို့ဆိုလျှင် ကျန်းမာရေးမကောင်းသည့်အပြင် အသက်အရွယ်အားဖြင့် ကြီးမားနေသော်လည်း နေထိုင်စရာမရှိသဖြင့် ရဲတပ်ဖွဲ့တွင် သေဆုံးသည်အထိ တာဝန်ထမ်းဆောင်သွားသူများ ထုနှင့်ဒေးဖြစ်နေသည်ကို သိရှိတွေ့မြင်နေရပါတယ်။

ထို့ပြင် ကိုလိုနီခေတ်က အရိပ်ဆိုးများနှင့် စစ်အစိုးရ၏ချယ်လယ်မှုများကြောင့် ပြည်သူများ၏ အမြင်မှာ ရဲတပ်ဖွဲ့အပေါ် အမြင်ကြည်လင်ခြင်း မရှိသဖြင့် ရဲတပ်ဖွဲ့သို့ ၀င်ရောက်တာဝန်ထမ်းဆောင်မှုများမှာ နည်းပါးလျက်ရှိသည်ကို တွေ့မြင်ရပါတယ်။

မြန်မာနိုင်ငံရဲတပ်ဖွဲ့သည် ယ္ခုဆိုလျှင် နိုင်ငံအုပ်ချုပ်မှုအပိုင်းတွင် အဓိကအခန်းကဏ္ဍတွင် ပါဝင်လှုပ်ရှားနေရသည်ကို တွေ့မြင်ရပါတယ်။ သို့အတွက်ကြောင့် ၎င်းတို့၏ လုပ်ခလစာများလည်း ထိုက်သင့်လျှောက်ပတ်သည့် လစာများနှင့် တပ်ဖွဲ့တွင် လိုအပ်သည့် အဆောင်အရောင်များအား အပြည့်အ၀ ပေးစေချင်ပါတယ်။

မြန်မာနိုင်ငံရဲတပ်ဖွဲ့တွင် မကြာခဏ ရဲပြေးမှုများ ဖြစ်ပွားလေ့ရှိပြီး အဆိုပါ ရဲပြေးများအား ဖမ်းဆီးပြီး ထောင်ဒဏ်များ ချမှတ်လျှက်ရှိသည်ကို တွေ့မြင်နေရပါတယ်။ ရဲပြေးမှုများ ဖြစ်ပွားရခြင်းများ၏ အများစုတပ်ဖွဲ့ဝင်များသည် ရဲတပ်ဖွဲ့တွင် တာဝန်ထမ်းဆောင်ရန် ဆန္ဒမရှိတော့သဖြင့် တရားဝင်ထွက်စာများအား အဆင့်ဆင့်တင်ပြသော်လည်း ဆိုင်းငံ့ခြင်း၊ ပယ်ဖျက်ခြင်းများကြောင့် အဆိုပါ ရဲပြေးမှုများ ဖြစ်ပေါ်လျှက်ရှိနေသည်ကို တွေ့မြင်ရပါတယ်။

စိတ်ဆန္ဒမရှိတော့သူများအား အဓမ္မအမိန့်ပေး စေခိုင်းခြင်းများ ပြုလုပ်ပြီး လိုက်နာဆောင်ရွက်မှုများ မရှိပါက အထက်သို့ စာများတင်ပြကာ အဆိုပါတပ်ဖွဲ့ဝင်အား တောခေါင်ခေါင်နေရောများသို့ ပြောင်းပစ်ပြီး ၎င်းတို့လက်မှလွတ်အောင် ဆောင်ရွက်နေကြသည့် လူကြီးများလည်း ရှိနေသည်ကို တွေ့မြင်ရပါတယ်။

၎င်းတို့အတွက်သာ ကြည့်ပြီး လက်အောက်ငယ်သားများ အပေါ် “ဘယ်သူသေသေ ငတေမာလျှင်ပြီးရော” ဆိုသည့်အတိုင်း ဆောင်ရွက်နေကြပါတယ်။

ရဲတပ်ဖွဲ့တွင် တာဝန်ထမ်းဆောင်ရန် စိတ်ဆန္ဒမရှိတော့ သူများအား အတင်းအဓမ္မ အမိန့်ပေး စေခိုင်းခြင်းများအား ဆက်လက်လုပ်ဆောင်နေမယ်ဆိုပါက ယ္ခုပြောင်းလဲလာသည့် ဒီမိုကရေစီခေတ်ကြီးတွင် မည်သို့ဆောင်ရွက်ကြမည်နည်း။

အထက်အကြောင်းအရာအား ရေးသားဖေါ်ပြရခြင်းမှာ စာရေးသူ၏ သူငယ်ချင်းဖြစ်သူသည် ၂၀၀၇ ခုနှစ်က ရှမ်းပြည်နယ်ရဲတပ်ဖွဲ့တွင် တာဝန်ထမ်းဆောင်နေစဉ် ရဲတပ်ဖွဲ့တွင် ဆက်လက်တာဝန်ထမ်းဆောင်ရန် စိတ်ဆန္ဒမရှတော့သဖြင့် ရဲစခန်းမှူးထံ တရားဝင်တောင်းဆိုသော်လည်း ခွင့်မပြုသည့်အပြင် စခန်းမှူးမှ သင်တန်းများထည့်ခြင်း၊ အခြားရဲစခန်းသို့ ပြောင်းရွေ့ရန် အထက်အကြီးအကဲထံသို့ တင်ပြခြင်းများ ဆောင်ရွက်ခြင်း ခံခဲ့ရသဖြင့် ရဲတပ်ဖွဲ့မှ ထွက်ခွာသွားခဲ့ပါတယ်။

အဆိုပါတပ်ဖွဲ့ဝင်အား ခွင့်မဲ့ (၂၁) ရက်ကျော်လွန်သဖြင့် ရဲပြေးဟု ကြော်ငြာခြင်းခံရပြီး အဖမ်းခံခဲ့ရကာ တောင်လေးလုံးအကျဉ်းထောင်သို့ ပြစ်ဒဏ် (၁) နှစ် ကျခံခဲ့ရပါတယ်။

တပ်ဖွဲ့သို့ မိမိဆန္ဒအလျောက်ဝင်လာပြီး မိမိထွက်ချင်ပါက တင်ပြသော်လည်း အရာမရောက်၊ ထွက်ခွာသွာပါကလည်း ပုဒ်မတွေတပ်ပြီး ထောင်ဒဏ်ချ၊ တရားမျှတမှု မရှိကြောင်း တွေ့မြင်ရပြီး၊ အဆိုပါတပ်ဖွဲ့နည်းတူ အခြားရဲတပ်ဖွဲ့မှ တပ်ဖွဲ့ဝင်များ တရားဝင်နှုတ်ထွက်ခွင့် တင်ပြသော်လည်း ခွင့်မပြုဘဲ အကြောင်းအမျိုးမျိုးရှောင်လွဲနေသည့် တာဝန်ရှိပုဂ္ဂိုလ်များကြောင့် ရဲတပ်ဖွဲ့မှ ထွက်ခွါသွားပါက ပုဒ်မတွေတပ်ပြီး အပြစ်ပေးထောင်ချဦးမည်လားလို့ ရဲချုပ်ကြီးကို မေးခွန်းမေးရင်းနဲ့ နိဂုံးချုပ်လိုက်ပါတယ်။

ရဲတပ်သားတစ်ဦး